சந்திப்பு

Artist: John Miller

கல் சிங்கங்கள் கவனிக்கக் கடற்கரையில் இருக்கிறேன்

என்னையே அறியாமல்

எண்ணற்ற வேறுவேறு கடற்கரைகளில் இருப்பது போலிருக்கிறது

வேறெங்கேயோ புகைக்கிறேன்

அதன் கிறுகிறுப்பு இங்கு என்னில் ததும்புகிறது

வேறெங்கேயோ மண்ணை உருட்டி எறிகிறேன்

அதன் சப்தம் இங்கு எனக்குக் கேட்கிறது

தெரியவில்லை

இன்னும் கொஞ்சநேரத்தில்

நான் இங்கிருந்து எழுந்து செல்வேனா

அல்லது வேறெங்கிருந்தோ எழுந்து செல்வேனா

**