நாளையே நாளையே

Artist:Robert ParkeHarrison

இத்தனை ஆண்டுகளில்
நிறையவே மறந்துவிட்டிருக்கிறேன்
ஒரு எவ்வனமான பொன்னிலக்காட்சியை
முன்னூறு வருஷங்களைப்
பதப்படுத்திவைத்திருக்கும் தாத்தாப் பாட்டியை
சில முயல் மேகங்களை
மறதியின் புற்றிலிருந்து நன்னயத்தின் பொறியை அடைவதற்குள்
அனைத்தும் மாறிவிடுகிறது
நெஞ்சுக்கூட்டில் தேய்வழக்காகிப்போன
அதே எழுபத்தியிரண்டு தடவைகள்
ஏகச்சராசரமும் ஏவலிலிருக்கும்
ஓர் இரவுவேளையில் நான் கண்டேன்:
தாராபதத்தினிடையே
நாம் மறந்துபோன சகலமும்
சுழிமின்னல்கூட்டங்களாக வெட்டிக்கொண்டிருப்பதை
அன்புள்ள நாளையே எவரும் இதை நம்பப்போவதில்லை
அதனால் உனக்கு கவலையா என்ன
நாளையே நாளையே
உம்மால் எனக்குள் ஊடுருவி வரமுடியாதா
இங்கே உம்மை தடுப்பார் எவருண்டு
என்னை சந்தோஷத்திற்கு கூட்டிப்போ
கரடுமுரடான பாதையில் பயணிக்கும் ஒற்றை வண்டியைப் போல
என்னை சந்தோஷத்திற்கு கூட்டிப்போ

(கரப்பானியம் தொகுப்பிலிருந்து)