சின்னஞ்சிறிய சந்தோஷங்கள் இருண்ட காலத்தில் வாழ்கின்றன

Artist: Gurbuz Dogan Eksioglu

1

பெரிய சந்தோஷங்கள் வரும்போது

சின்னஞ்சிறிய சந்தோஷம்

விழிவிரிய மிரட்சியுடன் பார்க்கிறது

என்ன செய்ய

யாரோ ஒருவன்தான்

அதனிடம் தெம்புடன் இருக்கச்சொல்கிறான் 

2

ஒரு சின்னஞ்சிறிய சந்தோஷம்

டீக்கடையில் நின்று சிகரெட் பிடித்துக் கொண்டிருக்கிறது

இருசக்கர வாகனத்தில்

முறைத்துக் கொண்டே போகிறது பெரிய சந்தோஷம்

3

ஒருசமயத்தில்

சின்னஞ்சிறிய சந்தோஷத்தைக் கரப்பான் பூச்சி உட்பட

யாருமே கண்டுகொள்ளவில்லை

சுவரில் முட்டிக்கொண்டு தேம்பித் தேம்பி அழுகிறது