குரங்குகள் - ஆடம் ஜகாயெவ்ஸ்கி

ஒரு நாள் குரங்குகள் அதிகாரத்தைக் கைப்பற்றத் துணிந்தன.

தங்க முத்திரை மோதிரங்கள்,

விறைத்த சட்டைகள்,

நறுமணமிக்க ஹவானா சுருட்டுகள்,

பளபளக்கும் தோல் காலணிகளுக்குள் திணிக்கப்பட்ட பாதங்கள்.

பிற தேடல்களில் ஈடுபட்டிருந்த நாம்,

கவனிக்கவேயில்லை: யாரோ ஒருவர் அரிஸ்டாட்டிலை

வாசித்துக் கொண்டிருந்தார், வேறொருவரோ

முழுமையாக காதலில் ஆழ்ந்திருந்தார்.

ஆட்சியாளர்களின் உரைகள் சற்றே தாறுமாறானவையாக மாறின,

அவர்கள் உளறவும் செய்தனர், இருந்தாலும்

நாம் எப்போது தான் உண்மையாகச் செவிமடுத்திருக்கிறோம்?

இசைதான் நன்றாக இருந்தது நமக்கு.

போர்கள்: முன்னெப்போதையும் விட கொடூரமாக நடந்தன; சிறைகள்:

முன்பை விட மோசமாக நாற்றமடித்தன.

குரங்குகள்தான், அதிகாரத்தைக் கைப்பற்றிவிட்டன போலும்.

*