போற்றுவோம் நண்பர்களே

Artist: Herbert Bottger

ஒட்டுமொத்தமாகக் கைவிடப்பட்டது போலிருந்தது

முதலில் இப்பரந்த வயல்வெளியினால்

பின்பு என்னால்

நடந்து செல்கையில் 

தூரத்தில் 

ஒரு சோளக்கொல்லை பொம்மையினைப் பார்த்தேன்

இருந்தும் இல்லாது

பறவைகளின் நெரிசலையும் 

அதன் சாயைகளின் நெரிசலையும் 

நெறிப்படுத்திக்கொண்டு

ஏதோ தானொரு போக்குவரத்து காவலர் என்பதுபோல 

நின்றுகொண்டிருந்தது 

மானுடர்களுக்கும் இப்படியொருவர்

இருக்கவேண்டும்

அடிக்கடி விடுப்பு எடுத்துக்கொண்டு

அநேகமாக எந்நேரமும் உறங்கியபடி

எட்டாத் தொலைவினில்

ஓர் இன்மையின் வடிவிலிருந்து

சகலத்தையும் 

ஒழுங்குபடுத்தியவாறு

ஒரு மகத்தான ரகசியத்தைப் போல ஒருவர் இருக்கவேண்டும்

அவரை அந்தப் பேரின்மையைப்

போற்றுவோம் நண்பர்களே

**